Luces þe leod-king    leouuede wel longe
twa and feowerti wintre    mid muchere winne
her wes mete her wes drænc    men þer of dræmden
her weſ unimete fare    a þiſſere folc riche
Þiſ heo gunnen driuen    & forȝeten to ſwiðe
þat heom tæhte þe hehȝe mon    þe gode biſcop Dunian.
& Fagan hiſ iuære    þe while þe heo weorē here
Inne griðe þurh alle þīg    wunede Luces þe ing
þat cō þe ilke dæi    þat þe kīg dæd læi
leof him wes grið and ræd    inne Gleochæſtre he wes dæd
þær hehȝe Brutteſ    þene kīg bureden
Þawes þe weorlde swa uorð iuaren    seoððen ure drihte wes iboren
an hūdred ȝere and ſixti    þa þe kīg ſah to grunde
Seoððen Luces king wes dæd    here wunede a ſwiðe ſtrong red
ne bi-læfde he her neouðer    suſter ne broðe
ne quene ne næh cun    þe his caðel mihte heoldē
To Rome comen tiðende    of Luceſ þon kinge
hu þe king wæs hære dæd    & i þiſſe londe naſ na ræd
Heo makeden heore uerde    and ſenden to þiſſen ærde
Seuarus wes heore hære-toȝe    inne Rome he was ibore
Þe ferde wes ſwiðe ſtrōg    þeo comen heo to þiſe lond
Seuerius wende anan    to hæbbene þiſne kinedom
ah Bruttes weoren biſie    & ofte hine a-bæileden
ofte heo him wið fuhten    a feole cunne wiſen
Seuarus hine biðodte    whet he don miðte
in his herede he makede grið    & lette awæi þat vniriht
þat na man ne wurðe swa wod    ne witte bi-dæled
þat in his hirede breke grið    vppe leoome & uppe lif
of nauere nane þīge    þat come to his cleopinge
Þiſ iſeȝen Bruttes    þe weoren swiðe biſie
þat Seuarus in hiſ hirede    hæfde hehliche grið
& mong heom ſeoluē    vnimete seorȝen
Bruttes ſiȝē to-gæderes    fulle seoue þuſēd
& speken Seuarium wið    & ȝirden his hiredes grið
& he heom ȝette    & ȝef ȝiues swiðe gode
Þa wes Seuar hired    selcuðliche iſtronged
alle þe ær weoren buuen    he heom ſette bi-neoðen
& muchele luue heold wið    alle þat ȝirnden his grið
He uærde to Lunden    & heo hine vnder-fengē
he uerde þurh þiſ kinelond    & ſette hit ī his aȝere hond
& æuere heo fluȝen him bi-uoren    þe hiſ feond weoren
Swa ſwide he heom hænde    þat heo fluwē ouer Hunbre
heo fluȝē forð rihtes    þat heo comen to þȝā Peohtes
& heo heom vnder-fēgen    & nomen heom to iuarē
Heo makeden enne hehne cniht    heore here-toȝe forð riht
fæier cniht and hēde    Fulgenes wes ihaten
he heom ſcolde læden    & he heon ſculde ræden
Enne ende of Scotlonde    nom Fulgenes to his honde
þe ende him wes deore    he hæhte Dæire
Sæuarus frō Scotte wærð    seoððe aȝen wēde
& his folc lædde    in to Lundene
& Fulgenes vt of Scotlen    muchel ſcaðe makede
He leop in to Brutlond    mid muchele balu ræſſen
æhte he nom men he ſloh    he duden ſeorȝen inoht
& þuſ he uerde longe    inne Scotlande
Þis iherde Seuarus    þe īne Rome was kæiſere
and seoððen hider al þa lond    ſtod an his aȝere heond
þe kæiiſere ſende his ſeonde    ȝeōd feole londe.
lette him to beoden    swa monie of weorcmonnen.
þat he lette mankien ænne dic    þe wæſ wunderliche deop.
muche ȝād ſwiðe ſtronge    biſides Scotlonde
from ſæ to ſæ eode þæ dich    ælche oðere vnilich
Þe vfenen he makede ſcid wal    wunder ane cræftie
seoððen he ſette cnihtes    to witen hit dæies & nihtes
ꝥ neu’e Poht þer ouer ne com    ne næuere nan oðer mon
bute wha ſwa waldē ȝernen grið    & ſpæken þan kæiſere wið
& wunien forð here    mid Seuare þan kæiſere
Þat iherde Fulgenes    þat þis weorc iuorðed wes
þat he into þiſſe londe ne mihte    ne dæies ne nihtes
Nuſte he þa nænne ræd    þe him æuere þuhte god
he cleopede alle his dringches    þat heo comen to huſtinge
heore kinge to ræden    of his muchele neode
Heo him rædden ro faren    right into Cife
færliche he þider com    & fæire wes under-fon
He ſpac wið þan Peohtes    & ſwa muchel heom bi-hæhte
þat heo gædereden in þan ærde    mucle ſcip-ferde