Ye gallants bright, I rede you right,
Beware o' bonie Ann!
Her comely face sae fu' o' grace,
Your heart she will trepan.
Her een sae bright like stars by night,
Her skin is like the swan.
Sae jimply lac'd her genty waist
That sweetly ye might span.
Youth, Grace, and Love attendant move,
And Pleasure leads the van:
In a' their charms, and conquering arms,
They wait on bonie Ann.
The captive bands may chain the hands,
But love enslaves the man:
Ye gallants braw, I rede you a',
Beware o' bonie Ann!
This work was published before January 1, 1927, and is in the public domain worldwide because the author died at least 100 years ago.
This article is issued from Wikisource. The text is licensed under Creative Commons - Attribution - Sharealike. Additional terms may apply for the media files.